O próximo xoves publícase a obra de Ben Mezrich “Multimillonarios por accidente. El nacimiento de Facebook. Una historia de sexo, dinero, talento y traición”. Trátase da historia novelada do nacemento e evolución da rede social. Sen dúbida, outra referencia a ter en conta para comprender na súa totalidade o fenómeno Facebook.
O propio Mezrich preséntanos no seguinte vídeo a súa obra.
carlos
Living Stories: unha nova fórmula de presentar historias na rede
Living Stories é o último experimento que Google Labs acaba de facer público no ámbito da narrativa dixital. O proxecto conta coa colaboración de dous medios de renome dos EUA como son The New York Times e The Washington Post.
Este novo servizo busca presentar a cobertura completa dos medios sobre un determinado tema baixo unha visualización cronolóxica a través dunha liña do tempo. Ademais, outras noticias secundarias relacionadas dalgún xeito co tema principal tamén se poñen a disposición do lector nun segundo plano de navegación. Ademais, usuarios que se adentren neste novo experimento do laboratorio de aplicacións da compañía de Silicon Valley verán como a aplicación recorda a súa navegación previa para aforrarlles ler cousas que xa leron. Sen dúbida, a xente de Google Labs está traballando na ampliación e renovación dos horizontes e estándares da narrativa dixital. A continuación tedes unha demostración das posibilidades de Living Stories.
A comunición e a cultura nos espazos de proximidade a debate no Consello da Cultura Galega
O foro de debate celebrarase dende hoxe, luns, ata o mércores no Consello da Cultura Galega.
Hoxe deu comezo o foro A comunicación e a cultura nos ámbitos locais. Estratexias para recuperar, conservar e difundir a cultura nos escenarios de proximidade, organizado polo Arquivo de Comunicación, órgano do Consello da Cultura Galega.
O obxectivo que persegue o comité organizador do evento, -composto por Rosa Aneiros, Henrique Sanfiz e Xosé López- é provocar unha reflexión sobre a cuestión da comunicación e a cultura nos ámbitos locais nun contexto de mundialización que abarca todas as esferas (social, económica, comunicativa…).
Durante os tre días nos que se desenvolverá o foro, expertos en política, comunicación e cultura reflexionarán sobre os procesos de comunicación local na era dixital así como sobre as iniciativas culturais no mapa público da comunicación local de Galicia.
Máis información, aquí.
Membros de Novos Medios participan nestes días no I Congreso Sociedad Digital
Membros do grupo atopámonos, dende onte e ata mañá, participando no I Congreso Sociedad Digital organizado polo colectivo de investigación Socmedia, dirixido polo catedrático Francisco García.
O evento está a celebrarse na Facultade de Ciencias de la Información da Universidade Complutense de Madrid. Este encontro constitúese coma un evento de análise arredor do desenvolvemento actual da Socidade da Información, os retos e as oportunidades que xorden no ámbito dos contidos e servizos dixitais. Ademais, é este un espazo de intercambio de experiencias, información e coñecemento para a universidade, as institucións e a empresa privada. Podedes atopar máis información e seguir o congreso en directo na súa páxina web.
Manuel Castells: a interdisciplinariedade como seo da innovación
Castells defendeu con vehemencia a importancia da interdisciplinariedade e da transdisciplinariedade na universidade. O verdadeiramente relevante non é discutir en que campo da ciencia se desenvolve un traballo ou a pertinencia de que se chame dunha maneira ou outra, senón con que outros ámbitos se poden establecer pontes de colaboración.
Por que é tan importante para Castells esta colaboración entre disciplinas? Porque é nese terreo de ninguén, explicado como un lugar “entre fallas” polo profesor Castells valéndose dun símil coa xeoloxía, onde se produce a innovación, polo que se fai necesaria unha reconceptualización das disciplinas e dos camiños de colaboración que entre elas se poden debuxar.
Aquí remata a serie de posts destinados a comentar a magnífica conferencia que o profesor Castells impartiu en Santiago de Compostela o día 15 de outubro de 2009.
“Aprender a aprender” ou a autoprogramación actualización da man de obra, segundo Castells
Hoxe en día, afirmaba Castells, as persoas deben esforzarse en “aprender a aprender en un mundo interactivo”. Deben primar os individuos “autoprogramables”, aqueles que son capaces de adquirir novos coñecementos e recombinalos para poder acceder a unha redefinición laboral, sobre os “xenéricos”, os substituíbles e vulnerables ante os axustes á baixa dos recursos humanos nas empresas, os que carecen da capacidade de reciclaxe necesaria.
Neste senso, e tendo en conta que unha vez as persoas acceden ao mercado laboral contan con pouco tempo para poder acudir a centros de formación presencial, Castells enfatiza a necesidade da existencia de centros que posibiliten unha formación virtual de calidade. Esta formación de carácter virtual permite a reciclaxe continua da forza de traballo polo que os traballadores “xenéricos” terían oportunidades de “reprogramación” e inmersión en novos postos de traballo derivados da súa nova capacidade para adquirir coñecemento e recombinalo coa experiencia acumulada.
Manuel Castells: as 6 funcións da universidade
Castells sintetiza en 6 as funcións que a universidade ten desenvolvido ao longo da súa historia:
– A universidade que produce valores e lexitimación social propia da fase na que as escolas teolóxicas centraban a actividade universitaria.
– Función de selección de elites a través da súa educación e da configuración da súa rede social.
– A universidade formadora de profesionais propia da universidade tecnolóxica.
– Función de produción de coñecemento. Castells fala da universidade científica, función tardía que comezou a desenvolver na segunda metade do s.XIX en Alemaña e logo importada polos E.U.A. a finais dese mesmo século.
– A universidade educadora de masas. A universidade xeralista que estende o dereito á educación universitaria a todo o mundo. Os recursos non medran proporcionalmente ás necesidades plantexadas polo incremento de alumnos. Trátase do que Castells acuñou como “café para todos, pero descafeinado”.
– Función emprendedora. A universidade emprendedora xestiona a conexión entre o mundo da empresa e a produción de coñecemento que se desenvolve no seu seo. É a encargada de trazar pontes de relación para que o fluxo de coñecementos entre a universidade e a necesidade de desenvolvemento de aplicacións e tecnoloxías da empresa privada sexa continuo, frecuente e de calidade.
Ningunha universidade desenvolve as seis funcións na súa totalidade xa que segundo Castells é “imposible” que isto suceda. Hoxe en día, as institucións universitarias deberían centrarse en acadar calidade na súa actividade desenvolvendo algunha das funcións anteriormente descritas. A excelencia debe ser un dos fins primeiros das universidades xunto coa súa función de servizo público (que non implica a exclusión das universidades privadas que realicen tamén unha boa labor de servizo á público) e a necesidade de autoconstituirse como espazos con autonomía propia para servir á sociedade nun contorno de liberdade.
Castells sitúa a universidade no centro do mundo
“A universidade é a institución central do mundo en que vivimos”. Deste xeito comezou Manuel Castells a conferencia que impartiu onte na Sala de Debates do Centro de Estudos Avanzados da USC. Este papel central que Castells apunta susténtase no feito de que son as universidades e non outras institucións as principais produtoras de coñecemento así como as responsables de formar a quen manexa, aplica e xestiona ese coñecemento. A intervención, titulada “A Universidade na era da información” serviu para que o profesor Castells apuntara as función básicas da universidade, herdanza das diferentes etapas históricas polas que pasou, así como para tratar temas tan interesantes como a necesidade de reciclaxe que os traballadores experimentan no mundo actual e as formas de facerlle fronte valéndose das novas tecnoloxías ou a relación entre as disciplinas do coñecemento científico e a súa relación.
Iremos publicando algunhas reflexións que o profesor Castells realizou durante a conferencia de onte.
Manuel Castells visita a facultade
Manuel Castells acompañado por Manuel Gago (esquerda) e Xosé Pereira (dereita).
A Facultade de Ciencias da Comunicación tivo a honra de contar hoxe coa presencia do catedrático Manuel Castells, que foi acompañado na súa visita polos profesores Xosé Pereira, Manuel Gago e polo investigador Carlos Toural.
Manuel Castells explicará en Santiago a súa visión sobre a universidade na era da información
Manuel Castells, profesor da Universitat Oberta de Catalunya, Catedrático Emérito de Socioloxía e Catedrático de Planificación Urbana e Rexional da University of California (Berkeley), impartirá este xoves a conferencia titulada “La universidad en la era de la información”. O acto terá lugar na Sala de Debates do Centro de Estudos Avanzados no Parque de Vista Alegre, en Santiago de Compostela, o xoves día 15 ás 19:00 horas.
Na páxina de Novos Medios daremos boa conta do que o profesor Castells aporte a esa visión sobre a relación entre a universidade e o período histórico que está a vivir, a era da información.