Redes sociais e streaming marcan os hábitos xuvenís de consumo en Europa

O servizo de Intelixencia de Medios da Unión Europea de Radiodifusión (EBU-MIS) publicou en setembro de 2025 un informe centrado nos hábitos de consumo mediático da mocidade europea. O estudo analiza o período 2017-2025 e ofrece unha panorámica comparada a partir de enquisas en máis de vinte países.

Entre as principais conclusións destacan:

• Predominio do dixital: as redes sociais e a música en streaming concentran a maior parte do tempo mediático da mocidade, aínda que o uso frecuente de redes sociais descendeu nos últimos anos.
• Smartphone estabilizado: o teléfono móbil continúa a ser o dispositivo central, pero o tempo de visionado en smartphones chegou a un pico e empeza a diminuír, en beneficio da Smart TV.
• Plataformas líderes: Instagram mantén a maior taxa de uso mensual entre a mocidade (88%), seguido de TikTok (70%), mentres YouTube e Netflix lideran no consumo de vídeo baixo demanda.
• Música e podcasts: o streaming musical mantén unha alta penetración (87% semanal), cunha crecente disposición a pagar subscricións. Os podcasts estabilízanse, con audiencias ocasionais máis que diarias, e YouTube é xa a plataforma principal para videopodcasts.
• Fatiga dixital: case a metade da mocidade europea sente saturada polo exceso de servizos en liña dispoñibles. Ademais, un número crecente manifesta ansiedade polo uso das redes sociais e preocupación polo tempo que pasan conectados.
• IA como tecnoloxía emerxente: a intelixencia artificial é percibida como a innovación máis emocionante pola metade da poboación nova, moi por riba doutras tecnoloxías como a realidade virtual.

O informe tamén sinala que, malia a forza das plataformas internacionais, os servizos de medios públicos (PSM) seguen presentes entre os dez máis utilizados pola mocidade en 17 dos 21 países analizados, situándose como primeira opción local en oito deles.

📄 Informe completo dispoñible a través da EBU-MIS: Digital Media Consumption Trends – Youth 2025.