Novidades do grupo

A profesora Berta García Orosa ven de gañar unha praza de catedrática no Departamento de Ciencias da Comunicación da Universidade de Santiago de Compostela. García Orosa, licenciada en Ciencias da Comunicación e Ciencias Políticas e da Administración, forma parte do grupo Novos Medios e coordina o Máster Universitario en Xornalismo e Comunicación Multimedia.

Cunha longa traxectoria docente e investigadora, Berta García dirixe actualmente o proxecto de I+D “Radón en España: percepción da opinión pública, axenda mediática e comunicación de risco” (RAPAC).

Más información: https://investigacion.usc.gal/investigadores/59100/detalle

Os profesores Alba Silva, Jorge Vázquez e José Sixto veñen de conseguir prazas de titular da área de Xornalismo nos concursos celebrados na Facultade de Ciencias da Comunicación de Santiago de Compostela os días 19 e 20 de xullo. Estes tres investigadores, cunha intensa e brillante traxectoria no campo do xornalismo dixital, forman parte do grupo Novos Medios da Universidade de Santiago de Compostela.

Alba Silva, Jorge Vázquez e José Sixto levan adiante liñas de investigación no campo dos medios nativos dixitais, das narrativas dixitais, do xornalismo móbil, dos contextos dixitais, das redes sociais e do impacto da alta tecnoloxía no xornalismo.

Máis información

Alba Silva Rodríguez: https://investigacion.usc.gal/investigadores/60394/detalle

Jorge Vázquez Herrero: https://investigacion.usc.gal/investigadores/60562/detalle

José Sixto García: https://investigacion.usc.gal/investigadores/60403/detalle

Sara Pérez Seijo, profesora de Xornalismo na Facultade de Ciencias da Comunicación da Universidade de Santiago de Compostela e investigadora do grupo Novos Medios, foi distinguida co VII Premio Lorenzo Gomis á mellor tese doutoral que outorga a Sociedad Española de Periodística (SEP).

Recibiu este recoñecemento pola súa tese titulada “Xornalismo inmersivo con vídeo 360 graos: evolución, experiencia de usuario e produción das radiotelevisións públicas europeas”, onde aborda a narrativa inmersiva con vídeo 360 graos aplicada ao relato xornalístico. A investigadora, que realizou a súa investigación predoutoral no marco do programa de Comunicación e Información Contemporánea da Escola de Doutoramento Internacional (EDIUS), recolleu o premio Lorenzo Gomis na clausura do XXIX Congreso da SEP, celebrado na Facultad de Comunicación y Relaciones Internacionales “Blanquerna” da Universitat Ramon Llull (Barcelona) entre o 29 e o 30 de xuño de 2023.

En concreto, na súa investigación a autora estuda o fenómeno coñecido como xornalismo inmersivo atendendo a tres perspectivas: a súa evolución e desenvolvemento, así como o valor que o formato de vídeo 360 graos achega ao relato de non ficción fronte a outras formas xornalísticas convencionais; a experimentación coas tecnoloxías inmersivas e as particularidades dos contidos de non ficción en vídeo 360 graos producidos polas radiotelevisións públicas europeas; e a experiencia do usuario na reportaxe inmersiva.

Esta investigación, defendida o 30 de setembro de 2021, foi dirixida polo catedrático da Universidade de Santiago de Compostela Xosé López García e recibiu a máxima cualificación (Sobresaliente cum laude).

Acceso á tese no repositorio Minerva: http://hdl.handle.net/10347/27055

O profesor Carlos Ferrás Sexto, investigador de Novos Medios, tomou posesión a comezos deste ano como catedrático de Xeografía Humana na Universidade de Santiago de Compostela. Actualmente, Ferrás Sexto é Académico Visitante Fulbright na University of California–Berkeley.

Na Universidade de Santiago de Compostela, Carlos Ferrás dirixiu a creación da Fundación Centro de Estudos Eurorrexionais CEER e o Máster en Sociedade da Información e o Coñecemento, e coordinou o Máster en Planificación e Xestión do Desenvolvemento Territorial. Foi profesor e investigador convidado na Universidade de Guadalaxara (México), na University of California–Berkeley, na Universidade de Cork (Irlanda), na Universidade de Keele (Reino Unido) e na ISM International School of Management en Dortmund (Alemaña). A súa investigación céntrase na interacción da análise espacial e da psicoxeografía cos sistemas e tecnoloxías da información.

O profesor Miguel Túñez López, investigador principal do grupo Novos Medios e ex decano da Facultade de Ciencias da Comunicación, vén de conseguir unha cátedra de Xornalismo no Departamento de Ciencias da Comunicación da Universidade de Santiago de Compostela, logo de anos acreditado. Túñez López, cunha dilatada traxectoria investigadora e docente, acadou, o pasado 10 de febreiro, a máxima nota dunha comisión integrada polos catedráticos Mercedes Caridad, Carmen Marta Lazo, Pastora Moreno, Xosé Soengas e Xosé López. Na sesión pública das probas da praza, convocada co perfil de Comunicación organizacional, estivo arroupado polos seus compañeiros de Novos Medios, por profesores e alumnos da Facultade de Ciencias da Comunicación e por un grupo de profesores doutros departamentos da Universidade de Santiago de Compostela.

Miguel Túñez López lidera o proxecto de investigación VALCOMM,  dirixe a cátedra de RTVE-USC sobre Medios de Servicio Público en Europa e ocupa a subdirección de Ciencias Sociais e Xurídicas na Escola de Doutoramento Internacional da USC.

A profesora Alba Silva Rodríguez e o profesor Jorge Vázquez Herrero, docentes do Departamento de Ciencias da Comunicación e investigadores do grupo Novos Medios, veñen de ser acreditados para profesores titulares de Xornalismo. Alba Silva é licenciada en Xornalismo pola Universidade de Santiago e doutora pola mesma universidade, mentres Jorge Vázquez graduouse en Comunicación Audiovisual pola Universidade da Coruña e doutorouse en Comunicación e Información Contemporánea pola Universidade de Santiago de Compostela.

Alba Silva Rodríguez, actual vicedecana da Facultade de Ciencias da Comunicación de Santiago, está especializada en Xornalismo dixital, Xornalismo móbil e Xornalismo multimedia. Pola súa parte, Jorge Vázquez, actual secretario da Facultade de Ciencias da Comunicación da Universidade de Santiago de Compostela, está especializado en Narrativas dixitais, Documentación informativa, Xornalismo dixital e Novos soportes e arquitectura da información xornalística. Os dous investigadores teñen unha brillante traxectoria académica e científica, con estadías de investigación en universidades de referencia e con publicación de artigos científicos nas principais revistas do campo da Comunicación.

Para máis información sobre a produción científica de Alba Silva Rodríguez, ten activo o seu perfil en Google Scholar e no Portal da Investigación da USC.

Para máis información sobre a produción científica de Jorge Vázquez Herrero, ten activo o seu perfil en Google Scholar e no Portal da Investigación da USC.

Carlos Toural Bran, secretario do grupo Novos Medios, vén de gañar unha praza de profesor titular da área de Xornalismo, no Departamento de Ciencias da Comunicación da Universidade de Santiago de Compostela. A comisión de selección, presidida polo catedrático José Soengas Pérez, estivo formada polos profesores catedráticos Carlos Elías Pérez (Universidad Carlos III de Madrid), Carmen Marta Lazo (Universidad de Zaragoza), Bella Palomo Torres (Universidad de Málaga) e Xosé López (Universidade de Santiago de Compostela).

Toural Bran, que na actualidade dirixe o Gabinete do Reitor da Universidade de Santiago de Compostela, é licenciado en Xornalismo e doutor en Comunicación pola USC.

Máis información: perfil en Google Scholar

O profesor José Sixto García, docente do Departamento de Ciencias da Comunicación e investigador do grupo Novos Medios, conta coa acreditación para profesor titular de Xornalismo. José é licenciado en Xornalismo pola Universidade de Santiago e doutor pola mesma universidade en Comunicación e Información Contemporánea.

José Sixto, actual secretario do Departamento de Ciencias da Comunicación de Santiago de Compostela, está especializado en marketing dixital, xornalismo dixital, xornalismo e redes sociais e órganos e sistemas de regulación. Sixto García ten unha brillante traxectoria académica e científica, con estadías en universidades de referencia da nosa contorna e con publicacións de artigos científicos nas principais revistas do campo da Comunicación.

Para máis información sobre a produción científica de José Sixto García, ten activo o seu perfil en Google Scholar e no Portal da Investigación da USC.

A profesora Berta García Orosa, docente do Departamento de Ciencias da Comunicación e investigadora do grupo Novos Medios, vén de ser acreditada para catedrática da área de Xornalismo. Berta García Orosa é licenciada en Xornalismo e Ciencias Políticas e da Administración, encabeza un proxecto de investigación titulado Radón en España: percepción de la opinión pública, agenda mediática y comunicación del riesgo (RAPAC) e lidera, con Xosé López, a liña de investigación en xornalismo dixital (medios nativos dixitais) do grupo Novos Medios. As súas principais liñas de investigación son a comunicación política e a o xornalismo dixital. A investigadora, cunha brillante traxectoria académica e científica, realizou estadías de investigación na Universidade do Minho (Portugal), México, Costa Rica, Brasil e Uruguai.

Para máis información sobre a producción científica de Berta García Orosa, ten activo o seu perfil en Google Scholar e no portal de investigación da USC.