novosmedios

O proxecto Medios audiovisuais públicos ante o ecosistema das plataformas: modelos de xestión e avaliación do valor público de referencia para España (VALCOMM) recibiu o ‘Premio Roblón ao Proxecto de Investigación de Comunicación do Ano’ concedido pola Revista Latina de Comunicación Social (RLCS) en virtude da súa rigorosidade e contribución á Academia e á sociedade no seu conxunto.

VALCOMM enmárcase nas actividades do grupo de investigación Novos Medios (USC) e céntrase no estudo dos modelos de xestión dos medios públicos (PSM). No desenvolvemento do proxecto participa un equipo de 35 investigadores/as, de 13 universidades españolas coordinados/as polos investigadores da USC o Dr. Miguel Túñez (IP1) e o Dr. Francisco Campos (IP2).

O traballo deste equipo de investigadores/as xerou nos seus primeiros 18 meses 14 artigos JCR, 8 artigos Scopus e 32 participacións en congresos internacionais. Ademais, ultima a publicación de monografías en editoriais internacionais e, en colaboración coa Cátedra Institucional RTVE-USC, nacionais que se unen aos 14 capítulos de libro xa publicados.

Ao proxecto adscríbense 12 teses doutorais e a realización de eventos de proxección internacional como a International Doutoral Summer School ‘The values of the commons in the dixital society’. Na súa rede de contactos inclúese a directivos/as das cadeas públicas de Alemaña (ARD e ZDF); Bélxica (VRT e RTBF); Dinamarca (DR); España (RTVE); Finlandia (YLE); Francia (France TV); Gran Bretaña (BBC); Países Baixos (NPO); Irlanda (RTÉ); Italia (RAI); Suecia (SVT); Suíza (RTS); así como membros da UER, aos que incorpora frecuentemente nos seus paneis de expertos.

Os Premios Roblón buscan resaltar o talento, a perseveranza e a dedicación de investigadores e investigadoras, así como de profesionais comprometidos no vasto mundo das Ciencias da Comunicación e as súas disciplinas relacionadas.

Os gañadores das demais categorías da presente edición pódense consultar nesta ligazón.

A profesora Berta García Orosa ven de gañar unha praza de catedrática no Departamento de Ciencias da Comunicación da Universidade de Santiago de Compostela. García Orosa, licenciada en Ciencias da Comunicación e Ciencias Políticas e da Administración, forma parte do grupo Novos Medios e coordina o Máster Universitario en Xornalismo e Comunicación Multimedia.

Cunha longa traxectoria docente e investigadora, Berta García dirixe actualmente o proxecto de I+D “Radón en España: percepción da opinión pública, axenda mediática e comunicación de risco” (RAPAC).

Más información: https://investigacion.usc.gal/investigadores/59100/detalle

Os profesores Alba Silva, Jorge Vázquez e José Sixto veñen de conseguir prazas de titular da área de Xornalismo nos concursos celebrados na Facultade de Ciencias da Comunicación de Santiago de Compostela os días 19 e 20 de xullo. Estes tres investigadores, cunha intensa e brillante traxectoria no campo do xornalismo dixital, forman parte do grupo Novos Medios da Universidade de Santiago de Compostela.

Alba Silva, Jorge Vázquez e José Sixto levan adiante liñas de investigación no campo dos medios nativos dixitais, das narrativas dixitais, do xornalismo móbil, dos contextos dixitais, das redes sociais e do impacto da alta tecnoloxía no xornalismo.

Máis información

Alba Silva Rodríguez: https://investigacion.usc.gal/investigadores/60394/detalle

Jorge Vázquez Herrero: https://investigacion.usc.gal/investigadores/60562/detalle

José Sixto García: https://investigacion.usc.gal/investigadores/60403/detalle

Sara Pérez Seijo, profesora de Xornalismo na Facultade de Ciencias da Comunicación da Universidade de Santiago de Compostela e investigadora do grupo Novos Medios, foi distinguida co VII Premio Lorenzo Gomis á mellor tese doutoral que outorga a Sociedad Española de Periodística (SEP).

Recibiu este recoñecemento pola súa tese titulada “Xornalismo inmersivo con vídeo 360 graos: evolución, experiencia de usuario e produción das radiotelevisións públicas europeas”, onde aborda a narrativa inmersiva con vídeo 360 graos aplicada ao relato xornalístico. A investigadora, que realizou a súa investigación predoutoral no marco do programa de Comunicación e Información Contemporánea da Escola de Doutoramento Internacional (EDIUS), recolleu o premio Lorenzo Gomis na clausura do XXIX Congreso da SEP, celebrado na Facultad de Comunicación y Relaciones Internacionales “Blanquerna” da Universitat Ramon Llull (Barcelona) entre o 29 e o 30 de xuño de 2023.

En concreto, na súa investigación a autora estuda o fenómeno coñecido como xornalismo inmersivo atendendo a tres perspectivas: a súa evolución e desenvolvemento, así como o valor que o formato de vídeo 360 graos achega ao relato de non ficción fronte a outras formas xornalísticas convencionais; a experimentación coas tecnoloxías inmersivas e as particularidades dos contidos de non ficción en vídeo 360 graos producidos polas radiotelevisións públicas europeas; e a experiencia do usuario na reportaxe inmersiva.

Esta investigación, defendida o 30 de setembro de 2021, foi dirixida polo catedrático da Universidade de Santiago de Compostela Xosé López García e recibiu a máxima cualificación (Sobresaliente cum laude).

Acceso á tese no repositorio Minerva: http://hdl.handle.net/10347/27055