Estratexias da comunicación política dixital nun novo libro publicado por Palgrave

Digital Political Communication Strategies, editado pola profesora Berta García Orosa e con prólogo de Manuel Castells, explora as estratexias centrais da comunicación política no eido dixital. O libro repasa a evolución do campo nos últimos 25 anos e examina a coexistencia de vellos e novos actores (grupos de presión, cidadáns, parlamentos, partidos políticos, medios de comunicación, plataformas dixitais, entre outros), así como as tácticas de comunicación híbridas. Os temas que se tratan son os marcos, as noticias falsas, as burbullas de filtros, as cámaras de eco, a intelixencia artificial, a importancia das emocións e o compromiso cos cidadáns.

Ao atoparnos na cuarta onda da comunicación dixital, e tras unha pandemia que sacudiu os cimentos da comunicación política, a avaliación destes temas é esencial para a reinvención da democracia. O libro está dirixido a estudantes e investigadores que desexen profundar nas últimas tendencias da comunicación dixital, aos actores da comunicación política e aos xornalistas. Ademais, pretende preparar aos cidadáns para enfrontarse eficazmente ás mensaxes que difuminan a liña entre a verdade e a mentira con estratexias cada vez máis potentes apoiadas na intelixencia artificial.

García-Orosa, Berta (ed.) (2022). Digital Political Communication Strategies. Multidisciplinary Reflections. Palgrave Macmillan. SpringerLink

Publicada a monografía “Medios nativos digitales en España”

O libro Medios nativos digitales en España, editado por Comunicación Social Ediciones y Publicaciones, ofrece unha radiografía do panorama actual e as tendencias do xornalismo dixital. Este libro, coordinado por Ramón Salaverría e María del Pilar Martínez-Costa, foi elaborado no marco do proxecto DIGINATIVEMEDIA 2019-2021, que levaron adiante trinta investigadores das universidades de Navarra e Santiago de Compostela. O proxecto estivo financiado polo Ministerio de Ciencia, Innovación y Universidades e o Fondo Europeo de Desarrollo Regional (FEDER).

Nesta monografía, de máis de trescentas páxinas, afírmase que os medios nativos contan con estruturas e técnicas adaptadas con naturalidade á contorna dixital. O conxunto de artigos que recolle o libro constitúe unha análise das diferentes dimensións destes medios nativos dixitais, con referencias comparativas con medios non nativos e sempre no contexto do ecosistema mediático español e europeo.

A partir do estudo dun corpus de 2.874 medios dixitais, Medios nativos digitales en España. Caracterización y tendencias revela os trazos do actual mercado xornalístico dixital en España. Con foco nos nativos dixitais, analiza a tipoloxía dos cibermedios, a súa distribución xeográfica e diversidade temática, os modelos de negocio, ademais dos seus métodos nas redes sociais. Tamén explica as súas estratexias tecnolóxicas e narrativas, así como a aparición de novos perfís profesionais.

O Museu Virtual da Lusofonia esténdese polo mundo

O Catedrático Moisés de Lemos Martins, do Departamento de Ciencias da Comunicación da Universidade do Minho, dirixe o Museu Virtual da Lusofonia. Esta iniciativa consta dunha plataforma de cooperación académica, en ciencia, no ensino e nas artes, dentro do espazo dos países de lingua portuguesa e das súas diásporas.

Esta institución cultural e dixital é accesible dende museuvirtualdalusofonia.com e Google Arts&Culture.

 

 

“A lusofonía por vir”, a debate na USC

A Asociación Galega de Investigadores e Investigadoras en Comunicación (AGACOM), o Grupo de Estudos Audiovisuais (GEA) e o Grupo Novos Medios (GNM) organizan en Santiago de Compostela unha mesa redonda na que, baixo o título “A lusofonía por vir”, intervirán Xosé Ramón Pousa (Universidade de Santiago), Víctor Freixanes (Real Academia Galega), Margarita Ledo Andión (Universidade de Santiago de Compostela) , Margarida Mª Krohling Kunsch (Universidade de São Paulo) e Moisés de Lemos Martins (Universidade do Minho). A sesión de debate está programada para as 16 horas do día 21 de outubro.

A mesa redonda poderá seguirse en directo por streaming.

Máis información

Aberta a chamada para artigos sobre procesos electorais nos Estados Unidos e Iberoamérica en Universitas

Universitas – Revista de Ciencias Sociales y Humanas presenta o call for papers “Elecciones en EE.UU. e Iberoamérica: campañas, comportamiento electoral, polarización y protesta”. Este número está coordinado polos profesores Berta García-Orosa (Universidad de Santiago de Compostela, España), Carlos Muñiz Muriel (Universidad Autónoma de Nuevo León, México) e Claudio Elortegui Gómez (Pontificia Universidad Católica de Valparaíso, Chile).

As temáticas destacadas que abrangue o número especial son:

1. Campaña electoral
2. Polarización
3. Axenda mediática, política e pública
4. A emoción na comunicación política
5. As redes sociais
6. Eco chambers
7. Efecto burbulla
8. Desinformación
9. Bots políticos
10. Comunicación parlamentaria
11. Pandemia COVID
12. Participación electoral
13. Imaxe dos candidatos
14. Movementos cidadáns

Convocatoria: https://universitas.ups.edu.ec/index.php/universitas/announcement

Data límite de entrega de artigos: 31 de decembro de 2021.

Novos Medios participa na creación dun observatorio de medios dixitais en España e Portugal

Nun proxecto financiado pola Comisión Europea e liderado polo catedrático Ramón Salaverría, da Universidade de Navarra

O consorcio de investigación IBERIFIER obtén financiación da Comisión Europea para conformar un dos oito hubs rexionais do European Digital Media Observatory. O proxecto ten por obxectivo a monitorización das ameazas da desinformación e o estudo dos medios dixitais.

O consorcio está formado por doce universidades, cinco fact-checkers e axencias de noticias e seis centros de investigación multidisciplinar. A iniciativa está liderada polo catedrático Ramón Salaverría, da Universidade de Navarra. Dende a Universidade de Santiago de Compostela, o grupo de investigación Novos Medios participa con varios investigadores no equipo.

O observatorio analizará as características e tendencias do ecosistema mediático ibérico, aplicará tecnoloxías computacionais para a detección de desinformación, verificará contidos con reportes á Comisión Europea, publicará informes estratéxicos sobre ameazas de desinformación e, por último, levará adiante iniciativas de alfabetización mediática.

Listado de instituciones participantes en IBERIFIER
Universidades
Universidad de Navarra (IP)
Instituto Universitário de Lisboa – ISCTE
Universidad de Granada
Universidad Carlos III de Madrid
Universidad de Santiago de Compostela
Universidad Politécnica de Valencia
Universidad Politécnica de Madrid
Universidad Miguel Hernández de Elche
Universitat de València – Estudi General
Universidade de Aveiro
Fundación Universitaria San Pablo CEU
Universidad Rey Juan Carlos

Verificadores y agencias de noticias
Maldita.es
EFE Verifica
Verificat
Polígrafo
Lusa – Agência de Notícias de Portugal

Otros centros de investigación
Real Instituto Elcano
FECYT
Barcelona Supercomputing Center – Centro Nacional de Supercomputación
Centro Protocolar de Formação Profissional para Jornalistas – Cenjor
OberCom – Observatório da Comunicação
Associação Literacia Para os Media e Jornalismo

Guía de xornalismo medioambiental “Proxecto Xermolo”

O alumnado de Redacción Informativa do Grao en Xornalismo e do Dobre Grao en Xornalismo e Comunicación Audiovisual da Universidade de Santiago de Compostela, baixo a coordinación dos profesores José Casás e Xosé López, elaboraron unha guía de xornalismo medioambiental “colaborativo e transmediático”. En colaboración co Colexio Profesional de Xornalistas de Galicia, a iniciativa segue a estela da Guía de linguaxe inclusiva publicada no 2019.

O chamado Proxecto Xermolo é un proxecto de Innovación Educativa de Aprendizaxe-Servizo na USC. Preséntase nun sitio web que abrangue os principais puntos en relación co xornalismo medioambiental: a problemática, o contexto político e legal, un glosario e entrevistas con expertos e xornalistas.

A Conferencia anual de ECREA en Braga posponse ao 2021

European Communication Research and Education Association (ECREA) publicou a convocatoria para participar na 8ª Conferencia Europea da Comunicación, organizada xunto ao Centro de Estudos de Comunicação e Sociedade da Universidade do Minho. Terá lugar no 2021 na cidade de Braga (Portugal).

A conferencia leva por tema ‘Comunicación e confianza: construíndo futuros seguros, sustentables e prometedores’.

O envío de propostas de comunicacións individuais, paneis e pósters pechou o 15 de xaneiro de 2020. Máis información e normas aquí.

Sitio web: ecrea2020braga.eu

Information Visualization in the Era of Innovative Journalism

Máis de trinta investigadores de tres continentes xuntan esforzos para a análise da evolución da visualización da información e a súa aplicación ao xornalismo en Information Visualization in the Era of Innovative Journalism. Este volume, promovido por investigadoras e investigadores do grupo Novos Medios, leva a cabo un repaso retrospectivo e prospectivo sobre a presenza da visualización da información como ferramenta para a comunicación humana nun contexto de cambio constante motivado pola innovación tecnolóxica. A principal misión do libro é dar conta da adaptación da visualización da información e, de xeito máis particular, dun bo número de formatos visuais a este escenario de mudanzas.

Publicado pola editorial Routledge, Information Visualization in the Era of Innovative Journalism aparece como resultado das actividades realizadas nos proxectos Cibermedios nativos dixitais en España: formatos narrativos e estratexia móbil e Novos valores, gobernanza, financiación e servizos audiovisuais públicos para a sociedade de Internet: contrastes europeos e españois, actualmente en curso no seo do grupo Novos Medios.

Este libro, publicado o 21 de abril de 2020, está dispoñible tanto en formato impreso como e-book  na páxina web da editorial Routledge

O manual ‘Comunicación móvil’ repasa as múltiples perspectivas deste paradigma

A Editorial UOC publica un libro sobre comunicación móbil no que participa significativamente o grupo Novos Medios

A colección Manuales da Editorial UOC publicou a finais do pasado ano o libro Comunicación móvil, xa dispoñible nas librerías e no sitio web da editorial. A publicación está coordinada polos profesores Carmen Costa (Universidade da Coruña) e Xosé López (Universidade de Santiago de Compostela) e conta coa participación de 16 autores e autoras nos dez capítulos que conforman a obra.

Sinopse. O paradigma móbil entrou con forza nas nosas vidas e condiciona a nosa forma de relacionarnos e de informarnos. O xornalismo, a comunicación e a publicidade enfróntanse ao tsunami da mobilidade aplicando estratexias de adaptación e innovación. Cada capítulo aborda ditos cambios desde unha mirada particular e para un sector específico, co retrato da súa situación e a análise dos mencionados cambios, desde un punto de vista práctico. Inclúe entre as súas perspectivas: o xornalismo móbil, as ferramentas es as apps móbiles, a comunicación corporativa e as audiencias.

Acceso ao libro: http://www.editorialuoc.cat/comunicacion-movil